وشەدان

سەرچاوە: نالی

عەطرفشان

ئەوەی بۆنی خۆش بڵاو ئەکاتەوە.

ماوەردە لەسەر خەرمەنی گوڵ عەطرفشانە،
یا ئاوی حەیاتە: عەرەقی وردی موحەییات؟!

سەرچاوە: نالی

عەنان

جڵەو.

ئەسپی نەفەست دێت و دەچێ، گەرمه عەنانی
ئەی مەستی ڕیاضەت هەڵه ! هوشیاری جڵەو به

سەرچاوە: نالی

عەیان

ئاشکرا و دیاریی.

ئەوا نیشانەیی مەرگم عەیانە
کە من غەرقی خەم و خوێن و زوخاوم

سەرچاوە: نالی

غلیمان

جەمعی غولامه به مەعنا بەنده.

غلیمانه، گوتم، خاڵی لەطیفت که له سەر دا
ئەم قیبله برۆیانه که غارتگەری دینن

سەرچاوە: نالی

غیلمان

جەمعی غولامە واتە کوڕی تازە پێگەیشتوو.

جەننەت پڕی ویلدانە، خادیم هەمو غیلمانە
خانم کە تێدا حۆرین، یەکسەر هەموو حەسنا کچ

سەرچاوە: نالی

غەڵطان

تێکەڵ. تێوەگلاو.

لە ئالیی ئەشکی « نالیی » بێکەسە، غەڵطانی نێو خاکە
مەگەر سەمعی قەبووڵت موشتەریی لوولوویی لالا بێ!

سەرچاوە: نالی

فوغان

هاوار و گریان.

دەنگی فوغان و جۆش و خورۆشی جەمیعی خەڵق
گوێ لێرە دەیبییێ، کە لەوێ گوێ هەموو کەڕە

سەرچاوە: نالی

فەوران

فەوەران، هەڵقوڵان.

چەشمێکە میثلی خۆر کە لە صەد جێ، بە ڕۆشنی
فەورانی، نووری صافە لەسەر بەردی وەک بلوور

سەرچاوە: نالی

قودس ئاشیان

ئەوەی ئاسمان جێی بێ.

لە هێلانەی زەمیندا وەک شتور مورغ
منی قودس ئاشیان بێ باڵ و پەڕ مام

سەرچاوە: نالی

قوربان - ی دووهەم -

قوربانیی. (ی) کەی ضەمیری غائیبە.

هەر کەسێ ڕووی تۆ دەبینێ، خۆی بە قوربانت دەکا
چونکە ئەبرۆی تۆ هیلالی عیدە، قوربانی دەوێ

سەرچاوە: نالی

قەدکەوان

ئەوەی قەدی وەک کەوان چەمیبێتەوە.

چ قەد کەوانێ؟ وەکوو پێ شکاو و ئوفتادە،
کە بازی سێ قەدەمی قەت نەداوە وەک پەڕی تیر

سەرچاوە: نالی

قەراغ. آسمانَةٌ

ئاسمانێکه،

کَاْنَّ کَنارَ أرْضِهِ آسْمانَةٌ
لِبَرْزِیٌّ دُورِی لِسَبزِیِّ عَرْدِهِ

سەرچاوە: نالی

قەڵغان

بەرگرێکی له پۆڵا دروست کراوە له چەشنی ساج، جاران شەڕکەر گرتوویانه به ڕوویانەوە بۆ خۆ پاراستن له تیر و شیری دوژمن.

مەڵێن کەڵکی نەبوو، ڕۆیی، جەهەننەم!
سەرم قەڵغانه بۆ تیری قەضاتان

سەرچاوە: نالی

لازەمان

ئەوەی لە کاتا نییە. کینایەیە لە خوا.

کە مەدعووی لازەمان و لامەکان و قوربی بێچوونی
سوار بە لەم بوراقە باریقە، لەم ڕەخشە ڕەخشانە

سەرچاوە: نالی

لامەکان

ئەوەی لە شوێندا نییە. کینایەیە لە خوا.

کە مەدعووی لازەمان و لامەکان و قوربی بێچوونی
سوار بە لەم بوراقە باریقە، لەم ڕەخشە ڕەخشانە

سەرچاوە: نالی

لامەکان سەیران

ئەو کەسەی لە شوێنی ناشوێندا سەیرانی کردووە.

مەکانی واسیطەی ئیمکان، مەکانەت بەخشی ئینس و جان
مەکینی لامەکان سەیران تێدا تەشریفی میوانە!

سەرچاوە: نالی

لەبی مەرجان

لێوی وەک مەرجان سوور.

شیرەیی جانە وتم یا مەیە؟ چا بوو فەرمووی
عەکسی لەعلی لەبی مەرجانە لە فنجانمدا

سەرچاوە: نالی

لەرەزان

لەریوە.

بایێ لە طەرەف قیبلەمەوە دێت و وەزانە،
یا بۆیی هەناسەی دەمی غونچەی لەرەزانە؟!

سەرچاوە: نالی

لەعلی بەدەخشان

لەعل بەردێکی سووری گرانبەهایە لە کان دەرئەهێنرێ و بەدەخشانیش وڵاتێکە لە ڕۆژەڵاتی باشووری ئێران بە کانی لەعل ناوبانگی دەکردووە.

من گریە، ئەتۆ خەندە بە یەکدی دەفرۆشین
من لەعلی بەدەخشان و ئەتۆ لوئلوئی لالا

سەرچاوە: نالی

مافیها ی زەمان

ئەوەی لە جیهاندا هەیە.

غەیری زوڵفی تۆ کە ڕشتەی عومرمە
دەس لە (مافیها) ی زەمان بڕیاوم ئەز

تۆڕی زاراوەپارێزیی وشەدان