وشەدان

سەرچاوە: نالی

باراویی

سەیدی باراویی.

کە جێگەت بۆ عیبادەت بێ، چ فەوقانیی، چ تەحتانیی
کە حوببت بۆ سیادەت بێ، چ (بەرزنجیی) ، چ (باراویی)

سەرچاوە: نالی

بارش

بارین.

شەرەر و تابش و بارش لە دەمی ڕەعدی بەهار
ئەثەری سۆزشی گریانە لە ئەفغانمدا

سەرچاوە: نالی

باری خودایا

خودای باریی، خودای دروستکەری دنیا! سەبەبکار

دووری له من خستەوە بێ سەبەبێ یاری من
باری خودایا که تۆ، بگری سەبەبکاری من!

سەرچاوە: نالی

بارید

سارد.

ئەی واعیظی بارید چییە هەروەک هەرەسی کێو
بەو وەعظە کە بایە هەمو، هاتوویی بەسەرما؟!

سەرچاوە: نالی

باریق

تیژ وەک برووسکە.

کە مەدعووی لازەمان و لامەکان و قوربی بێچوونی
سوار بە لەم بوراقە باریقە، لەم ڕەخشە ڕەخشانە

سەرچاوە: نالی

باریی

خوا.

شەعائیر یەک بەیەک مەسرووری سیڕڕی غەیبی لاڕەیبیی
مەساعیی سەربەسەر مەشکووری دەرکی بەیتی باریی بێ!

سەرچاوە: نالی

بارێ

کەڕەتێک.

سەر خاتیمەیی حوسنی عیادەت کە نەهاتی
بارێ بگەرە فاتیحەوو دەئبی زیارەت!

سەرچاوە: نالی

بارەوەر

بارەبەر، بار هەڵگر.

زوڵف ئەگەر دووکه ڵه، دووکەڵ بەری گوڵناری نییە!
سەروە گەر قامه تی، کەی سەروی ڕەوان بارەوەرە؟!

سەرچاوە: نالی

باز

یاخود سێ باز , یارییەکە جاران فەقێ، بەهاران و پایزان، بە ڕۆژانی سێشەممە و جومعەدا ئەیانکرد. یارییەکە بەم جۆرەیە

ئێستەش کەناری حەوشەکە جێی باز و کەوشەکە،
یاریی تیایە، یا بووەتە مەعرەضی نوفوور؟

سەرچاوە: نالی

بازا

باز ئا، وەرەوە. وشەکە لەبنەڕەتا فارسییە.

ڕوخم ڕەنگینی ڕەنگی ڕوومەتی ڕەنگینتە، بازا !
قەدی سەروم کەمانینی قەدی شیرینتە، بازا!

سەرچاوە: نالی

بازانە

وەک باز.

ئەلا ئەی نەفسی بوومئاسا، هەتا کەی حیرصی وێرانە!
لەگەڵ ئەم عەشقبازانە بڕۆ بازانە، ئازانە!

سەرچاوە: نالی

بازوو

قۆڵ.

خڵخاڵی قەدم، وەک خەمی زولفەینی سەراپات،
پشتانی قەدت بێت و فیدای بازنی بازووت

سەرچاوە: نالی

بازی سپیی

جۆرە بازێکی بەنرخە.

سایەیی پایە وەکوو باڵی هوما و بازی سپیم
نە وەکو بوومی قەدەم شووم و نە هەمڕەنگی قەلم

سەرچاوە: نالی

باصیرە

چاو.

شەوقی کە نەبێ باصیرە، مەئیوسە لە دیتن
هەر شەوقی ئەوە قووەتی دینی بە نەظەر دا

سەرچاوە: نالی

باطیل

بەتاڵ، دانەمەزراوە.

بێ نیییەتی تەقبیلی دەمت عاطیلە ڕۆژووم
بێ حەضرەتی میحرابی برۆت باطیلە نوێژم

سەرچاوە: نالی

باعیث

هۆ.

ثوبووتت باعیثی نەفیی منە، وەک لامی زولفەینت
لە هەردوو لا قەدت بگرێتە ناو، وەک (لامەلفلا) بێ

سەرچاوە: نالی

باغی سێوان

مەبەست سنگی یارە که مەمکی وەک سێوی پێوەیه.

له دوگمەی سوخمه دوێنێ نوێژی شێوان
بەیانی دا سفیدەی باغی سێوان

سەرچاوە: نالی

باغیی

یاخیی، لەخوانەترس.

طاغیی و باغیی و، باغی گوڵ و نەیرەنگ و فەنی
شاد و شادابە بە گوڵ ئاتەشیی و نارەوەنی

سەرچاوە: نالی

باغیی

گوڵی ناو باخ یاخود یاخیی بوو و لە ڕێ لاداو.

چونکە مەنشووری گوڵەندامیی بە ناوی خۆی دەوێ
یار، ئەگەر لەو باغییانە کەس بمێنێ، عارە بۆی

سەرچاوە: نالی

باغەبان

باخەوان.

نەخل و ڕوممان پێکەوەن، یا باغەبان وەی کردووە:
سەروی هێناوە لە سێب و بەی موتوربەی کردووە!

تۆڕی زاراوەپارێزیی وشەدان