وشەدان

سەرچاوە: نالی

چەسپانی

گورجوگۆڵی.

ئیستیطاعە و قووەتی طەبعم، بە کوردی و فارسی
عارەبی، ئیظهاری چالاکیی و چەسپانی دەکا

سەرچاوە: نالی

چەشمێکە

چەشمەیەکە، کانییەکە.

چەشمێکە میثلی خۆر کە لە صەد جێ، بە ڕۆشنی
فەورانی، نووری صافە لەسەر بەردی وەک بلوور

سەرچاوە: نالی

مورغی چەمەن

پەلەوەری ناو مێرغوزار.

لەگەڵ مورغی چەمەن « نالیی » دەناڵێ
که یەعنی عاشق و هەم فەرد و فەردین

سەرچاوە: نالی

نۆ چەرخ

حەوت ئاسمانە کە و مانگ و ڕۆژ.

دنیای چلۆن دەوێ که بەقەد هیممەتی نەکرد
ئەم خەلعەتە که ئەتڵه سی نۆ چەرخی ئەستەرە

سەرچاوە: نالی

چەرخ

ئاسمان.

وەڵڵاهی کڵاوی سەری من چەرخی دەماڵیی
ببووایە بە دامانت ئەگەر دەستڕەسێکم

سەرچاوە: نالی

چەرخ - ی یەکەم -

هەرچیی کە بسووڕێتەوە. لێرەدا مەبەست تەشییە.

زەمانە چەرخ و، چەرخی ئاسمانیشی، فەلەک فیلکە
سەری ڕشتەی وجوودی چەندە باداویی و هەر ماوی

سەرچاوە: نالی

چەرخ –ی دووهەم -

سووڕانەوە.

زەمانە چەرخ و، چەرخی ئاسمانیشی، فەلەک فیلکە
سەری ڕشتەی وجوودی چەندە باداویی و هەر ماوی

سەرچاوە: نالی

چەرخی ئەخضەر

ئاسمانی سەوز.

پەیغامبەر و حەبیبی خودا، (خاتَمُ الرَّسُل)
ڕەوضەی له ئەرض و سایە لەسەر چەرخی ئەخضەرە

سەرچاوە: نالی

چەرخی ئەطڵەس ڕەنگ

ئاسمانی شین.

کولاهی فەخر و تەعظیمم گەیشتە چەرخی ئەطلەس ڕەنگ
کە بیستم قەلبی میرانم لەسەر مەملووکی ئاغایە

سەرچاوە: نالی

چەرخی دەوران

ئاسمانەکان.

وەها هەستا بە باڵی جاذیبەی قودرەت، لە نیوەی ڕێ
بەجێما ئەسپ و پەیک و ڕەفڕەف و ئەم چەرخی دەورانە

سەرچاوە: نالی

چەسپیدە

چەسپاو و پڕ بە پڕ.

چەسپیدەوو خڕ هەروەکو بەر قاڵبی دابێ
نەختێکی لەبەر توندیی و سفتیی قڵەشابێ؟!

سەرچاوە: نالی

چەشمەسار

سەرچاوە.

یا چەشمەساری خاطری پڕ فەیضی عاریفە
یەنبووعی نوورە دابڕژێنێ لە کێوی طوور

سەرچاوە: نالی

چەمەن

باخ و گوڵزار. چیمەن.

دڵ دەڵێ سەیری چەمەن خۆشە، جەوابی نادەم
موددەتێکە لە قەفەسدایە، عەذابی نادەم

سەرچاوە: نالی

چەمەن ئارا

چیمەن ڕازێنەوە،

تا نەگریا ئاسمان و تەم وڵاتی دانەگرت،
گوڵ چەمەن ئارا نەبوو، هەم لێوی غونچە وا نەبوو

سەرچاوە: نالی

چەمەن پیرا

وشەیەکی فارسییە واتە ئەوەی باخ ئەڕازێنێتەوە، باخەوان.

تا چەمەن پیرا لەسەر، ئەصڵی درەختی لانەدا،
فەرعی تازە، خوڕڕەم و بەرز و بوڵەند باڵا نەبوو

سەرچاوە: نالی

چەمەنزار

جێگای سەوزی.

بە ظاهیر گەر مەگەسدارە، بە باطین صەد چەمەنزارە
بە صوورەت یەک بە یەک خارە، بە مەعنا صەد گولوستانە

سەرچاوە: نالی

چەمەنیی

ئەوەی ڕەنگی وەک چیمەن سەوز بێ.

وەک گوڵی ئاتەشیی، خەمڵیوە بە بەرگی چەمەنیی
قامەتی نارەبەرە، ناروەرە، نارەوەنە

سەرچاوە: نالی

چەنبەرە

چەنبەرە، چەڵەمەی ملی گاجووت.

لە دەورانی طەبیعەتدا لەگەڵ ثەوری فەلەک جووتە
لە ملیا چەمبەری دەوران و طەوقی چەرخی گەردوونە

سەرچاوە: نالی

چەهچەهە

ئاوازی بولبول و پەلەوەرە دەنگ خۆشەکانی تر، لەو مەعنایەوە خوازراوە بۆ مەعنای (زڕە).

صەوتی نەغمەی بولبولە یا چەهچەهەی خڕخاڵیە؟!
دەنگی سۆلە، یا لەژێر پێی ناڵە ناڵی ناڵیە؟!

سەرچاوە: نالی

چەپکەن

جلوبەرگی ڕازاوەی شەو.

شەو چەپکەنی نەیلۆفەڕی و جیلوەیی ڕەقصی
شەرمندە دەکا زوهرەیی زەهرا لە سەمادا

تۆڕی زاراوەپارێزیی وشەدان