شەو ئەمما.

شەوەمما، شەوچراغی جەدی و ثەور و مەرتەعی شامی،
دوصەد قەرنی غەزالە و قۆچی صوبحی عیدی، قوربانە

هێزی دڵ.

« نالیی » نییەتی سیحری بەیان، حیکمەتی شیعرە
ئەمما نییەتی قووەتی دڵ، قودرەتی ئینشا

دڵڕەقیی.

ئەگەرچیی کوردی دووری شارەزووری قەسوەتم، ئەمما
وەسیلەم طەیبە و حیلمی شەفیع و فەضلی مەننانە

ماء الورد، گوڵاو.

ماوەردە لەسەر خەرمەنی گوڵ عەطرفشانە،
یا ئاوی حەیاتە: عەرەقی وردی موحەییات؟!

ئەوەی کە ماددەکان پەروەردە ئەکات.

ئەی شەمسی مایە پەروەر و ئیکسیری قەلبی خاک!
بنواڕە حاڵی هالیکی ئەم خاکە ئەحقەرە

هەڵاتوو و داوە کێو.

گۆشەگیرم له برۆت و موتەوەححیش له موژەت
ڕۆحی شیرینم ئەبەر شیر و قولابی نادەم

سپاردە.

شێخم، چ گەرمە حەڵقەیی ذیکرت بە ڕەشبەڵەک!
حاڵی ئەمانە خۆ بە جەنابت موحەووەلە!

موسەووەدە، ڕەشنووس، نووسراو بە لە پاکنووس کردنی.

بێتە حوجرەم، پارچە پارچەی موسوەدەم بکڕێ بە ڕۆح،
هەر کەسێ کووتاڵ و پارچەی بێ بەدەڵ سەودا دەکا

تەوق لە گەردن.

سەراپای گرتووی زوڵف، بۆیە بوویی
موقەییەد، هەم موخەلخەل، هەم موطەووەق!

پیس.

نەبوو ڕووم بێمە خاکی چاکی پاکی طەیبە، تا بیستم:
بە سەگ نابێ مولەووەث ئاوی زەرقا، بەحری ئیحسانە

ڕووناک، نوورانی.

سپی نەذیرە هەموو موو لە سیڕڕی (وَجهُ) لەسەر
مونەووەرە، لە طەرەف نوورەوە بووە بە نەذیر

شاری نوورانیی و پیرۆز، شاری مەدینه که پێغەمبەر له مەککەوە کۆچی بۆ کرد و لەوێ وەفاتی کرد.

ئەی ساکینی ڕیاضی مەدینەی مونەووەرە
لوطفێ بکه، بفەرموو: مەدینەی منە و، وەرە

ڕووناک.

دورجێکی موجەوهەر کە هەموو حوسن و بەها بێ
دوڕڕێکی مونەووەر کە هەموو ئاوی صەفا بێ

ئەو ئافرەتەی مەمکەکانی وەک هەناریان لێ هاتبێ [ لە لاپەڕی ٤١٢ و ٤١٣یشدا وشە و مەعنای وشەی (نارەوەر) بەپێێ ئێرە ڕاست بکەنەوە. ،

وەک گوڵی ئاتەشیی، خەمڵیوە بە بەرگی چەمەنیی
قامەتی نارەبەرە، ناروەرە، نارەوەنە

درەختێکی بەرز و گەورەی لق و پۆپ چڕی گەلا وردە، لە حەوشی زۆر لە تەکیە و خانەقاکانا هەیە بۆ سێبەر، بەری نییە.

دەسبەندیانە دێن و دەچن سەرو و نارەوەن،
یا حەڵقەیانە صۆفییی ملخوار و مەندەبوور؟

لە کوردیدا درەختێکی ساق ئەستوورە، لە بەرزیی و نزمیدا مام ناوەندییە، لق و پۆپ و گەڵای زۆری لێ ئەبێتەوە، هیچ جۆرە بەرێکی نییە. بەم مەعنایە بۆ ئەم شوێنە دەست نادا. لە فارسیدا بە مەعنای داری هەناریش هاتووە. ئەم مەعنایە بۆ ئێرە ئەگونجێ. دووریش نییە وشەکە بەهەڵە نووسرابێتەوە و (نارەبەن) بێ کەواتە درەختی هەنار.

قامه تی سەروی، ئەگەر بێبەرە بۆ چ نارەوەنه؟!
تۆ بێ زوڵفی ئەگەر دووکەڵه، بۆچ ناری بەرە! ؟

درەختێکی دار سەخت و، گەڵا ددانەدارە، بەر لە پشکووتنی گەڵای، گوڵەکانی ئەوەرێن.

وەک گوڵی ئاتەشیی، خەمڵیوە بە بەرگی چەمەنیی
قامەتی نارەبەرە، ناروەرە، نارەوەنە

ئاشکرا.

حوکمی قانوونی صەفا ڕۆییی له ڕەومی ڕوومەدا
تا هووەیدا بوو له ڕۆما گەردی ئاشووبی عەجەم

سووک کراوەی (واوەیل) ە، واتە

وەرە ساقیی! بەشین و نەدب و واوەی
ئەوا فەرشی حەیاتی خۆم دەکەم طەی

هاوار.

زێر و زەبەر دەبن بە دو فیرقە، لە فیرقەتەین
واوەیل و ئیمتیازە کە کێ بێنە کێ بەرە