چاوەڕوانیی چاوەلێكەرانە. سەیری چاوەڕوانی بكەن.

چاوەڕوانییەكان. ئەو ڕوانگە و بۆچوونانەیە كە لەسەر گۆڕاوی نادڵنیا (uncertain) (وەك نرخی سوود، نرخ، یان ڕێژەی باجی داهاتوو) هەیە. ئەگەر لە چاوەڕوانییەكاندا بە شێوەی سیستەماتیك هەڵە (یان هەڵەی ئاماری) نەكرێ و بەپێی گشت زانیارییەكانی بەردەست بێت، ئەوا بە چاوەڕوانیی ژیرانە دادەنرێت. ئەگەر چاوەڕوانییەكانی خەڵك بەپێی ڕەفتاری پێشوو بێت، ئەوا بە چاوەڕوانیی چاولێكەرانە دادەنرێت.

ڕاپۆرتی داهات. ڕاپۆرتی كۆمپانیایە بۆ كاتێكی دیاریكراو (كە بە گشتی ساڵێكە) كە تێیدا بڕی فرۆش و داهاتی دەسكەوتووی ئەو ماوەیە نیشان دەدات و گشت تێچوونەكانی لە بەرامبەر ئەو شمەكە فرۆشراوانەدا نیشان دراون و، قازانجیش (پوختەی داهات) لە پاش كەمكردنەوەی ئەو تێچوونانە بە دەست دێت. هەروەها پێیشی دەڵێن ڕاپۆرتی قازانج و زەرەری (profit and loss statement) كۆمپانیا.

ڕاپۆرت یان حیسابی سوود و زیان (سوود و زەرەر). سەیری ڕاپۆرتی داهات بكەن.

چاوەڕوانییە ژیرانەییەكان. سەیری چاوەڕوانییەكان بكەن.

گریمانی چاوەڕوانییە ژیرانەییەكان. ئەو گریمانەیە كە پێی وایە پێشبینكردنی خەڵك بێلایەنانەیە و زیاتر بەپێی زانیارییەكانی بەردەست و تیۆرییە ئابوورییە.

چاوەڕوانییە ژیرانەییەكانی ئابووریی تەڤ. ئەو قوتابخانەیەیە كە پێی وایە بازاڕەكان بە خێرایی ڕوون و شەفاف دەبنەوە و چاوەڕوانییەكانیش ژیرانەن. لە چوارچێوەی ئەم دۆخانە و دۆخەكانی تردا نیشان دەدات كە سیاسەتە پێشبینیكراوی ئابووریی تەڤ هیچ كاریگەرییەكی لەسەر بەرهەمی ڕاستەقینە و بێكاری نییە. هێندێک جار پێی دەگوترێ ئابووریی تەڤی نیوكلاسیك.

هەڵاواردنی ئاماری. واتە لەگەڵ تاكدا لەسەر بنەمای نێونجی ڕەفتار یان تایبەتمەندیی گرووپەكەی (یان كۆمەڵەكەی) هەڵسوكەوت دەكرێت. هەڵاواردنی ئاماری بە هۆی ئەوەوە كە پاڵنەری تاك بۆ زاڵبوون بەسەر ئەو كێشە ڕواڵەتییانەدا كەم دەكاتەوە، ئەوا خۆی بەرهەم دەهێنێتەوە.

حکومەتی خۆشگوزەران (خۆشبژی). چەمكی ئابووریی تێكەڵاوە كە لە كۆتایی سەدەی نۆزدە لە ئەورووپا سەری هەڵدا و لە 1930 گەیشتە ئەمەریکا. لە واتای نوێی حکومەتی خۆشبژیدا، بازاڕ چالاكییە وردەكانی ڕۆژانەی ئابووری ئاڕاستە و بە ڕێوە دەبات، بەڵام حكومەت ڕێوشوێنە كۆمەڵایەتییەكانی دیاری دەكات و سندووقی خانەنشینی، چاودێریی تەندروستی و لایەنەكانی تر، ئاسایش و دەستەبەری كۆمەڵایەتی دەستەبەر دەكەن.