کەژاڵ. بۆچوونێکی تایبەت هەیە وەهایە، پیتی «ق» لە کوردیدا نوێیە و ئێستەش زۆر زاراوە هەیە خۆی لێ دەبوێرێ هەر «ک»ی لێ بەکاردێنن. قرژاڵیش پێدەچێت کرژاڵ بووبێت و پیتی «ر» لێ سوابێت و «کژاڵ» مابێتەوە، موکریانیش خۆیان وەستای زاراوەڕۆنانن و «کەژاڵ»ـیان لێ سازاندووە. مام هێمن دەفەرموێت:
عاشقی چاوی کەژاڵ و گەردەنی پڕ خاڵ نیم
بمگرن، بمکوژن هێشتا دەڵێم کوردم ئەمن

بە شتێکی کە زۆر ڕوون و گەش بێت. لە کوردەواریدا ئاوێک ڕوون بێت، دەڵێن «ئەم ئاوە وەک چاوی قرژاڵ ڕوونە!» لە پژدەر دەڵێن «ئاسمان ساوە وەک چاوی قرژاڵ!» (ئەم ساوە پەیوەندەی بە ساماڵەوە هەیە). کەژاڵ ناوە بۆ کچ. پەسنە بۆ چاو، چاوکەژاڵ.

قرژاڵ، کێڤژال، کێڤژالە (کرمانجییە).