وشەدان

سەرچاوە: نالی

ظەریف

خۆش.

نوکتێکی ظەریفە بە نەصیبی ظورەفا بێ
تەعریفی دەکەم، بەڵکو لە بۆ دەرد * شیفا بێ

سەرچاوە: نالی

عاریض

ڕوومەت، کوڵم.

زولفت که لەسەر ڕوو به خەم و تابشە ئەمڕۆ،
دوودی سییەهی عوودە لەسەر عاریضی پشکۆ

سەرچاوە: نالی

عاریف

خواناس.

یا چەشمەساری خاطری پڕ فەیضی عاریفە
یەنبووعی نوورە دابڕژێنێ لە کێوی طوور

سەرچاوە: نالی

عاریە

خواستەمەنیی.

من لە بێبەرگیی (مەخە) م پرسیی، کە بۆچ ڕووتی؟ وتی:
« ڕەببی من شێت بم، ئەگەر شاد بم بە بەرگی عاریە!»

سەرچاوە: نالی

عاریە

عەیب و شوورەیی لێ دێ.

بەرگی دنیا هێندە کورت و کۆنە و بازاڕییە
چونکە ناگاتە گونی دێوانەکەی، لێی عاریە

سەرچاوە: نالی

عامیریی

ئەوەی لە هۆزی (بنی عامر) بوو.

پۆست بە کۆڵی (عامیری) فەرمووی کەوا بۆ پوختە بوون
جەوتی سەرکێوان گەلێ چاتر لە (تاڵیی شاری) یە

سەرچاوە: نالی

عوریانی

ڕووت و قووت.

خەرقە پۆشێ کەی دەپۆشێ جەوهەری ذاتی ئەمن؟
بیتە نێو، جیلوەی، بە زوشتی خۆی بە عوریانی دەکا

سەرچاوە: نالی

عەماریی

کەژاوە.

چ میعمارانە بۆ تەعمیری کەعبەی دڵ دەچێتە حەج!
خودا یار و مەدەدکار و نیگەهداری عەماریی بێ!

سەرچاوە: نالی

غەریق

خنکاو، نوقم.

گەر نییە ئاور لە سینەمەدا بە تاو
بۆچ لەبەر قوڵقوڵ غەریقی ئاوم ئەز؟!

سەرچاوە: نالی

فاریغ

بۆش.

نییه دیدەیی چ مەردوم، نییە مەردومی چ دیدە
لە فرووغی خەددی فاریغ، لە خەیاڵی خاڵی خاڵیی

سەرچاوە: نالی

فریب

هەڵخەڵەتاندن.

صاحێب زەڕ و زیوێ کە فریبی عوقەلا بێ
ئیکسیری طەڵای ئەحمەری چەند قەطرە لە لا بێ

سەرچاوە: نالی

قەمطەریر

دژوار و تەنگ و نالەبار.

ئەو ڕۆژی ئاخیرەی کە چ ڕۆژی لە دوو نییە
ڕوو ترش و قەمطەریر و عەبووس و غەضەنفەرە

سەرچاوە: نالی

مرواریی ئەشک

فرمێسکی وەک دەنکی مرواریی سپیی.

مروارییی ئەشکم وەکو یاقووتی، ڕەوانە
ساقیی! بدە لەو لەعلە شەرابێکی عەقیقیی..

سەرچاوە: نالی

موحریم

ئەو کەسەی نیازی حەجی هەبێ و چوبێتە ئیحرامەوە، و جلوبەرگی نەدووراوی ئیحرامی پۆشیبێ و سەری ڕووت کردبێ.

موغەیلانی جل و مێزەر دڕێنی صۆفییە، یەعنیی
ئەمە ڕێی موحریمانی مەحرەمی سەر ڕووت و عوریانە

سەرچاوە: نالی

موعتەریف

کەسێ دان به شتێکا بنێ.

مەشرەبی « نالیی » گەلێ ئابیی و ترشە، بەڵێ
موعتەریفه خۆی دەڵێ: چا نییە ئەطواری من

سەرچاوە: نالی

موعریب

ئەوەی سەر و ژێر ئەکا بۆ وشە و ڕستە لێک ئەداتەوە. لێرەدا ئەوەی (ئەم دیو و ئەو دیو) بە ئافرەت ئەکا.

لە نەحو و صەرفی ئەداتێ مەپرسە ئەی موعریب
کە ڕەفع و نەصب و جەڕ و جەزمە ئالەتی تەقریر

سەرچاوە: نالی

مەرید

یاخیی، کینایەیە لە شەیتان.

ئەو شێخە بە کوم مەگرە کە پەشمینە مەریدە
ئەو ڕیشە بەسەر دارەوە ڕیسێکی بوزانە

سەرچاوە: نالی

مەعاریف

زانست.

لە (دار العلم) ی تەحصیلی مەعاریف
وەکوو « نالیی » جەهوول و بێ خەبەر مام

سەرچاوە: نالی

نیگارین

وێنە لەسەر کراو.

دیدەم هەمو شۆراوە بە شۆراوی سوروشکم
لەم لەوحە نیگارینە نە عەین و نە ئەثەر ما

سەرچاوە: نالی

هەورین

هەور پێوە بوو.

ئاسمان هەورین دەبێ، ئێمەش به غەمگینیی دەڵێین:
ئەی خودا چ بکەین له ژێر ئەم کاولەی کەس تیا نەماو؟!

تۆڕی زاراوەپارێزیی وشەدان