شێوازی كلاسیك. سەیری ئابووریی كلاسیك بكەن.

ئابووریی كلاسیك. بریتییە لەو قوتابخانە ئابوورییەی كە سەرهەڵدانی بۆ بەر لە سەرهەڵدانی كینز دەگەڕێتەوە و ئادەم سمیس لە 1776دا دایمەزراند. لە ئابووریناسە سەرەكی و بەناوبانگەكانی ئەم ڕێبازە، پاش سمیس، بریتین لە: دەیڤد ڕیكاردۆ، توماس ماڵتووس و جۆن ستیوارت میل. بە گشتی، ئەم قوتابخانەیە پێی وایە ئەوە یاساكانی ئابوورییە (بە تایبەتی بەرژەوەندیی تایبەتی تاك و ڕكەبەرایەتی) كە نرخ دیاری دەكەن و فاكتەری پاداشتن و سیستەمی نرخیش بە باشترین ئامڕازی بەردەست بۆ تەرخانكردنی سەرچاوەكان دەزانێت.

ئابووریی تەڤی كلاسیك. سەیری تیۆرییەكانی كلاسیك بكەن.

تیۆرییەكانی كلاسیك (لە ئابووریی تەڤدا). ئەو تیۆرییانەیە كە جەخت لەسەر خۆڕاستكردنەوەی لایەنەكان (self-correcting forces) لە ئابووریدا دەكەن. لە شێوازی كلاسیكدا، دۆخی پڕكاری (هەلی كاری تەواو) ڕەخساوە و سیاسەتەكانی هاندانی خواستی گشتییش هیچ كاریگەرییەكیان لەسەر بەرهەم نییە.

ئابووریی تەڤی نیوكلاسیك. بریتییە لەو تیۆرییەی كە پێی وایە (1) نرخ و هەقدەست نەرمن و (2) خەڵك لەسەر بنەمای گریمانی چاوەڕوانیی ژیرانە (rational-expectations hypothesis) پێشبینیی دەكەن.

مۆدێلی نیوكلاسیكی گەشە. ئەو تیۆرییە یان مۆدێلەیە كە بۆ ڕوونكردنەوەی ڕەوتی درێژخایەن لە گەشەی ئابووریی وڵاتانی پیشەسازیدا بە كار دەهێنرێت. ئەم مۆدێلە جەخت لەسەر گرنگیی بەرفرەبوونی سەرمایە (بۆ نموونە، گەشەسەندنی ڕێژەی كرێكار-سەرمایە) و گۆڕانی تەكنەلۆجیا لە ڕوونكردنەوەی گەشەی GDPی ڕاستەقینەی ماتەوزەدا دەكات.